Х.Бөкеева атындағы қазақ драма театрында ұйымдастырылған салтанатты шара жоғары деңгейде өтті. Фестивальдің ашылуымен облыс әкімінің орынбасары Бақытжан Нарымбетов құттықтады.
– Бүгін Ақ Жайық толқып, Орал гүлдеп тұр. Пандемия бізді рухани тұрғыда аш қалдырғаны рас. Ал енді міне, ҚР Тәуелсіздігінің 30 жылдығы қарсаңында Оралда мәдени шараның басы-қасынан табылып отырмыз. Еуропа мен Азияның ортасында – Жайық өзені жағасында өтіп жатқан бұл фестиваліміздің дәстүрге айналып, халықаралық деңгейдегі беделі жоғары шараға айналады деген сенімдемін. Кинофестивальдің өңірде өтіп жатқан қазақ кино өнерінің жаңа белеске көтерілуінің айғағы десек болады, – деді Бақытжан Нарымбетов.
Қала басшысы Абат Шыныбеков фильмдер фестивалін ұйымдастыру идеясын қолдаған шара ұйымдастырушыларына зор алғысын жеткізді. Сондай-ақ өткен жылы «Қыз Жібек» киносына жарты ғасыр толғанын, ал биыл қазақ Қыз Жібегінің өзі мерейлі 70 жасқа толғанын атап, Меруерт Өтекешованың иығына камзол жауып, Жайық елінен естелік сый мен алғыс хат табыс етті.
Кинофестивальге 100-ден астам өтінім түскен. Қазылар құрамы өз жұмыстарын бастап кетті. Олар екі күні ішінде іріктеуден өткен 30 фильмді қарап, үздіктеріне аңдау жасайды.
Қысқа метражды деректі фильмдер бойынша үздіктерді танымал кино оператор, продюсер Талғат Тайшанов, «Aqjaiyq» телеарнасының директоры Асланбек Ғұбашев, продюсер-сценарист, көптеген деректі фильмдердің режиссері Айгүл Черендинова анықтайды.
Жүлдегерлер 10 аталым бойынша марапатталып, фестивальдің арнайы статуэткасына ие болмақ.
Томирис СҰЛТАН