16 мамырда Бакуде Әзербайжан Республикасы Милли Меджлисінің Гейдар Әлиевтің 100 жылдығына орай арнайы отырысы өтті. Басқосуға 30-дан астам елдің Парламент өкілдері, парламентаралық ұйымдар, Парламентаралық одақ, Араб Парламенті, ТүркПА және Қара теңіз экономикалық ынтымақтастығы Парламенттік Ассамблеясының өкілдері қатысты.
– Қазақстанда Гейдар Әлиев біздің елге және қазақ халқына деген шынайы бауырластық пейілімен белгілі. Ол екі ел арасындағы берік достық қарым-қатынасты дамытуға бар күш-жігерін жұмсады. Гейдар Әлиев әрдайым қазақ ұлты туралы айрықша көзқараста болып, түп-тамырымыз бен ортақ бай рухани мұраларымыз туралы айтатын, – деді Мәжіліс Спикері.
Сондай-ақ Ерлан Қошанов осы жылдың сәуір айында Астана қаласында өткен Гейдар Әлиев атындағы жаңа көшенің салтанатты ашылу рәсімі туралы мәлімет берді.
– Бұл іс-шараға Қазақстан мен Әзербайжан көшбасшылары Қасым-Жомарт Тоқаев пен Ильхам Әлиев қатысты. Көшенің ашылу салтанатында біздің Президентіміз: «Гейдар Әлиев секілді әлемдік деңгейдегі тұлғаның атын ұлықтау – біздің парызымыз. Астанада оның есімімен аталған жаңа көшенің ашылуы – біздің осы игі іске қосқан маңызды үлесіміз. Әзербайжан халқының ұлы перзентіне деген зор ілтипатымыз әрі шынайы құрметіміз» деп ерекше атап өткен болатын, – деді Мәжіліс төрағасы.
Ерлан Қошанов парламентаралық байланыс бауырлас елдеріміздің жан-жақты ынтымақтастығын нығайтуда маңызды орын алатынын айтты. Әзербайжанның Милли Меджлисінің бүгінгі іс-шарасы қазіргі қарым-қатынастардағы парламенттік дипломатияның рөлі ерекше екенін көрсетеді.
– Бұл өте жемісті де маңызды сапар болды. Шынайы достар мен бауырлардың кездесуі деуге болады. Біздің халықтарымызды жақындататын біраз іс-шара өтті және бірқатар салада маңызды құжаттарға қол қойылды. Біз, екі елдің парламентшілері, көшбасшыларымыз қабылдаған осы үлкен шешімдерді іске асыруға барынша үлес қосуымыз керек, – деді Мәжіліс спикері.
Ақпарат көзі: Мәжілістің Баспасөз қызметі