Шымкент қаласына Қазақстан Республикасы Президентінің жанындағы Мемлекеттік басқару академиясының ректоры Ерлан Қуанышұлы Әбіл арнайы жұмыс сапарымен келді. Ректор, ең алдымен, Мемлекеттік басқару академиясының Шымкент қаласындағы филиалында болып, мұндағы жұмыс барысымен танысты. Сонымен қатар ол Мемлекеттік қызмет мұражайының салтанатты ашылу рәсіміне қатысты.
– Соңғы жылдары Президеніміздің бастамасымен мемлекеттік қызмет саласында жүйелі реформалар жүргізіліп келеді. Атап айтқанда, Президент жанындағы Жастар кадрлық резервінің жасақталуы — басқару жүйесіне жас, талантты, білімді әрі ізденімпаз жастардың келуіне жол ашты. Мемлекеттік қызмет саласына ашықтық пен жариялылық және меритократия қағидалары батыл енгізіліп жатыр. Сондай-ақ, салаға факторлы-балдық шкала негізінде бағалау жүйесінің енгізілуі де мемлекеттік қызметшілердің нәтижелі еңбек етуге деген ынтасын арттырғанын да атап өткен жөн. Бір ауыз сөзбен айтқанда, бүгінде елімізде жастардың мемлекеттік қызметке келуіне, олардың өз білімі мен біліктілігін арттыру арқылы қызметте сатылап өсіп, табысқа жетуіне қолайлы жағдай жасалып отыр, – Е.Әбіл.
Оның айтуынша, мемлекеттік қызметте еңбек етіп, еліме қызмет етемін деген жастар үшін Қазақстан Республикасы Президенті жанындағы мемлекеттік басқару академиясы мол мүмкіндіктер ұсынады. Бұл академия мемлекеттік қызметшілерді оқыту жүйесіндегі басты оқу орны ғана емес, сонымен қатар мемлекеттік қызметшілердің жаңа буынын даярлаумен айналысатын бірден бір орталыққа айналған. Ол мемлекеттік басқарудың жаңа үлгісін қалыптастыруда және одан әрі дамытуда өз үлесін қосып келеді.
Б.Өнербаев Шымкент қаласындағы жергілікті атқарушы билік Академия және оның филиалымен алдағы уақытта да ынтымақтастық жағдайында жұмыс істеп, әріптестік байланыстарды одан әрі нығайтуға дайын екенін жеткізді. Ол бірлескен жұмыстың нәтижесінде Әділетті Қазақстанның іргетасын берік етіп қалай отырып, Мемлекет басшысы қойған міндеттерді толыққанды жүзеге асырып, халыққа шынайы, адал, ашық қызмет көрсететін, бюрократияға жол бермейтін сервистік сипаттағы мемлекеттік аппарат қалыптастыруға үлес қосатынына сенім білдірді.